ការសូនរូបចម្លាក់ចម្លង

សិប្បករកម្ពុជាមានជំនាញ និងបច្ចេកទេសឆ្លាក់យ៉ាងស្ទាត់ជំនាញបំផុត។ ទេពកោសល្យរបស់ពួកគាត់អាចត្រូវបានមើលឃើញតាមរយៈក្បូរក្បាច់រចនា និងចម្លាក់លឹបយ៉ាងល្អិតល្អន់នៅលើជញ្ជាំងប្រាសាទអង្គរវត្ត និងប្រាសាទបុរាណដទៃទៀតនៅទូទាំងប្រទេស។ នាពេលបច្ចុប្បន្ន ចម្លាក់ចម្លងត្រូវបានបង្កើតឡើង និងដាក់លក់ជាវត្ថុអនុស្សាវរីយ៍ក្នុងតម្លៃសមរម្យ ដែលមានតាំងពីបដិមាខ្នាតធំរហូតដល់ខ្នាតតូច។ សិប្បករបានចំណាយពេលជាច្រើនម៉ោងដើម្បីឆ្លាក់រូបនៅលើឈើ ថ្ម ឬសំរឹទ្ធ យ៉ាងផ្ចិតផ្ចង់ទៅតាមរចនាប័ទ្មដ៏ប្រណីត។ ស្នាដៃសិល្បៈទាំងនេះគឺជាគំរូចម្លងខ្នាតតូចនៃរូបអាទិទេព ព្រះពុទ្ធរូប តួអង្គអប្សរា និងរូបសត្វផ្សេងៗ។

ក្រៅពីនេះ ក៏មានសិល្បៈតុបតែងជញ្ជាំងដូចជា រូបចម្លាក់ឈើ និងផ្ទាំងឈើឆ្លាក់ដោយដៃផងដែរ។ ស្នាដៃសិល្បៈដ៏អស្ចារ្យទាំងនេះ អាចរកទិញបាននៅតាមផ្សាររាត្រីក្នុងរាជធានីភ្នំពេញ ខេត្តសៀមរាប និងមជ្ឈមណ្ឌលទេសចរណ៍ផ្សេងៗទៀត។