ស៊ីក្លូខ្មែរ៖ យានជំនិះជានិមិត្តរូបនៃអត្តសញ្ញាណជាតិ

ស៊ីក្លូ៖ មរតកវប្បធម៌ និងបទពិសោធន៍ទេសចរណ៍នៅកម្ពុជា

ស៊ីក្លូ គឺជាមធ្យោបាយធ្វើដំណើរដ៏ចំណាស់បំផុតនៅក្នុងប្រទេសកម្ពុជា ហើយក៏ជាបទពិសោធន៍ទេសចរណ៍ដ៏វិសេសវិសាលមួយនៅក្នុងប្រវត្តិសាស្ត្រសម័យទំនើប។

ស៊ីក្លូមិនត្រឹមតែជាផ្នែកមួយនៃវិស័យដឹកជញ្ជូនរបស់កម្ពុជាប៉ុណ្ណោះទេ ប៉ុន្តែវាក៏ជាបេតិកភណ្ឌវប្បធម៌មួយរបស់ប្រទេស ដែលមានអាយុកាលជាង ៨០ ឆ្នាំមកហើយ ព្រមទាំងបានក្លាយជាផ្នែកមួយនៃប្រវត្តិសាស្ត្រសម័យទំនើប សម្រាប់បទពិសោធន៍ទេសចរណ៍ក្នុងការទស្សនារាជធានីភ្នំពេញ។

យានជំនិះដ៏ល្បីល្បាញប្រភេទនេះ ត្រូវបានដាក់ឱ្យដំណើរការដំបូងក្នុងឆ្នាំ ១៩៣៦ ហើយរហូតមកដល់បច្ចុប្បន្ន វានៅតែជាមធ្យោបាយដ៏ល្អបំផុត និងមានតម្លៃសមរម្យបំផុតសម្រាប់ការធ្វើដំណើរកម្សាន្តជុំវិញទីក្រុង។

ស៊ីក្លូ ឬកង់បីដឹកអ្នកដំណើរ គឺជាមធ្យោបាយធ្វើដំណើរដ៏ពេញនិយមតាំងពីសម័យសហភាពឥណ្ឌូចិន (អាណានិគមបារាំង)។ លក្ខណៈពិសេសរបស់វាគឺអ្នកធាក់ស្ថិតនៅផ្នែកខាងក្រោយ ចំណែកឯអ្នកដំណើរត្រូវបានអង្គុយយ៉ាងមានផាសុកភាពនៅកៅអីខាងមុខ ចន្លោះរវាងកង់ពីរដែលទាបមកដី។