ម៉ូតូតាក់ស៊ីនៅកម្ពុជា

ការជិះម៉ូតូឌុប គឺជាមធ្យោបាយធ្វើដំណើរដែលថោកបំផុត និងលឿនបំផុតពីចំណុចមួយទៅចំណុចមួយទៀតនៅក្នុងប្រទេសកម្ពុជា។ ប៉ុន្តែ ការជិះនៅពីក្រោយម៉ូតូ ឬស្កូទ័រ ក៏ជាវិធីងាយស្រួលបំផុតមួយក្នុងការជួបគ្រោះថ្នាក់ផងដែរ។

ខាងក្រោមនេះគឺជាគន្លឹះមួយចំនួនសម្រាប់ការធ្វើដំណើរតាមម៉ូតូឌុប។ ចំណុចជាច្រើនត្រូវបានរៀបរាប់យ៉ាងលម្អិតនៅក្នុងផ្នែក "ការធ្វើដំណើរតាមរុឺម៉កកង់បី" ប៉ុន្តែចំណុចផ្សេងទៀតគឺមានភាពជាក់លាក់សម្រាប់តែម៉ូតូឌុបប៉ុណ្ណោះ៖

រៀបចំផែនទី ស្គាល់វត្តអារាម និងរៀនប្រាប់ផ្លូវជាភាសាខ្មែរ ត្រូវចងចាំជានិច្ចថា អ្នករត់ម៉ូតូឌុបភាគច្រើនមិនមែនជាអ្នកបើកបរអាជីពពិតប្រាកដនោះទេ។ ពួកគាត់គ្រាន់តែជាបុរសដែលមានម៉ូតូ ហើយនៅពេលឃើញជនបរទេសដើរតាមផ្លូវ ក៏ផ្តល់ការជូនដំណើរដើម្បីដោះដូរនឹងប្រាក់កាស។ នេះមានន័យថា ប្រសិនបើអ្នកជិះម៉ូតូឌុប អ្នកនឹងជួបជាមួយមន្ត្រីនគរបាលដែលសម្រាកពីការងារ គ្រូបង្រៀន ឬអ្នកជំនាញផ្សេងៗទៀត។ ទោះជាយ៉ាងណាក៏ដោយ អ្នកកម្រនឹងជួបអ្នកដែលមានចំណេះដឹងច្បាស់លាស់អំពីភូមិសាស្ត្រនៃទីក្រុងដែលអ្នកកំពុងនៅណាស់ ទោះបីជាពួកគាត់អះអាងដោយជឿជាក់ថាស្គាល់កន្លែងដែលអ្នកចង់ទៅច្បាស់ក៏ដោយ។

ចំណុចសម្គាល់តាមបែបខ្មែរ ត្រូវចាំថា ការប្រើឈ្មោះផ្លូវ និងផ្លូវកាត់តាមបែបបស្ចិមប្រទេស គឺជាជារឿងចម្លែកសម្រាប់ជនជាតិខ្មែរភាគច្រើន ដែលពួកគាត់ចូលចិត្តប្រើទីតាំងផ្សារ និងវត្តអារាមដើម្បីកំណត់ទិសដៅ។ ការរៀនឈ្មោះផ្សារ និងវត្តដែលនៅជិតគោលដៅរបស់អ្នកបំផុត នឹងជួយសន្សំសំចៃពេលវេលាបានច្រើន។ ការប្រាប់ផ្លូវជាភាសាខ្មែរក៏នឹងបង្កើតភាពខុសប្លែកគ្នាយ៉ាងខ្លាំងផងដែរ។

រក្សាសុវត្ថិភាព ច្បាប់ចរាចរណ៍នៅកម្ពុជានៅមានកម្រិត ហើយដងផ្លូវក៏មិនសូវមានសុវត្ថិភាពដែរ។ គ្រោះថ្នាក់ម៉ូតូគឺជាមូលហេតុចម្បងនៃមរណភាពក្នុងប្រទេសកម្ពុជា ហើយជនបរទេសរាប់មិនអស់បានរងរបួសជារៀងរាល់ឆ្នាំ ដោយសារពួកគេធ្វេសប្រហែសក្នុងការការពារខ្លួនជាមូលដ្ឋាននៅពេលជិះម៉ូតូ។

ប្រសិនបើអ្នកជ្រើសរើសជិះម៉ូតូឌុប សូមទិញមួកសុវត្ថិភាពមួយ ហើយពាក់វាជានិច្ចរាល់ពេលឡើងជិះម៉ូតូ។ ទោះបីជាអ្នកបើកបរម៉ូតូនៅកម្ពុជាតម្រូវឱ្យពាក់មួកសុវត្ថិភាពក៏ដោយ ប៉ុន្តែអ្នករត់ម៉ូតូឌុបមិនមានកាតព្វកិច្ចផ្តល់មួកសុវត្ថិភាពសម្រាប់អ្នកដំណើរឡើយ (ទោះបីជាមានច្បាប់ថ្មីកំពុងរៀបចំក៏ដោយ)។ ទោះជាមានច្បាប់ឬមិនមាន ក្បាលរបស់អ្នកនៅតែអាចរងគ្រោះធ្ងន់ធ្ងរនៅពេលបោកទៅលើផ្លូវថ្នល់។ ដូច្នេះ សូមពាក់មួកសុវត្ថិភាព និងត្រូវប្រាកដថាអ្នកមានធានារ៉ាប់រងសុខភាព ឬធានារ៉ាប់រងការធ្វើដំណើរ។

ការប្រុងប្រយ័ត្នចំពោះការឆក់កាបូប រឿងមួយទៀតដែលត្រូវចងចាំគឺ ជនបរទេសជាច្រើនត្រូវបានគេកំណត់គោលដៅឆក់កាបូបនៅពេលកំពុងជិះម៉ូតូឌុប។ សូមសួរអ្នកបើកបរថាតើគាត់អាចជួយកាន់កាបូបនៅខាងមុខគាត់ ឬអាចថ្ពក់វានឹងម៉ូតូបានដែរឬទេ។ មានករណីភ្ញៀវទេសចរនៅភ្នំពេញបានស្លាប់ នៅពេលមានគេមកឆក់កាបូប បណ្តាលឱ្យនាងធ្លាក់ពីលើម៉ូតូ ហើយត្រូវរថយន្តកិន ហើយមនុស្សជាច្រើនទៀតក៏បានរងរបួសក្នុងហេតុការណ៍ស្រដៀងគ្នានេះដែរ។ ប្រសិនបើចំណុចនេះធ្វើឱ្យអ្នកព្រួយបារម្ភ សូមពិចារណាជិះរុឺម៉កកង់បី ឬឡានតាក់ស៊ីវិញ។